KONUR Í LJÓSMYNDUN 2026

Þann 19. mars sl. stóðu Ofar og Canon fyrir vel heppnuðum viðburði þar sem konur í ljósmyndun voru í aðalhlutverki. Markmið viðburðarins var að varpa ljósi á mikilvægi kvenna í faginu, deila reynslu og skapa vettvang fyrir innblástur og tengslamyndun.

Fyrirlesarar kvöldsins voru ljósmyndararnir Daria Endresen og Íris Sveinbjörnsdóttir, sem báðar hafa byggt upp sterkan feril á sínu sviði. Þær deildu innsýn í sitt skapandi ferli, áskoranir á leiðinni og hvernig þær hafa þróað sinn einstaka stíl í síbreytilegum heimi ljósmyndunar. Kynnir var Arna Harðardóttir, forstjóri Helix Health.

Íris sækir innblástur í náttúruna og vinnur með fíngerð mynstur og smáatriði sem oft fara fram hjá okkur. Í verkefnum sínum leitast hún við að hægja á augnablikinu og skapa myndir sem fá áhorfandann til að staldra við og tengjast umhverfinu á dýpri hátt. Hún hefur unnið markvisst að seríunni Hringir, þar sem hún skoðar falin form náttúrunnar og opnar nýja sýn á hið óséða.

Daria leggur hins vegar áherslu á mannleg tengsl og tilfinningar, sérstaklega í brúðkaupsljósmyndun. Hún lýsir því hvernig það sé bæði ábyrgð og heiður að fá að skrásetja eitt mikilvægasta augnablik í lífi fólks. Með því að byggja upp traust og ná tengingu við viðfangsefnið tekst henni að skapa myndir sem lifa áfram langt út fyrir sjálfan daginn.

Viðburðurinn er hluti af áframhaldandi áherslu Ofar og Canon á að efla ljósmyndasamfélagið á Íslandi og styðja við fjölbreytileika innan greinarinnar.

Við þökkum Ofar og Canon kærlega fyrir þennan mikilvæga árlega viðburð og fyrir að deila þessum myndum með okkur.